3 members
جاري متجوز من ١٧ سنه ومخلفش ، وكان بيربي ف بنت اخوه فلما تزوجت ومبقتش تسال فيه حس بوحشه ووحده ..
- بيشتكلي فبقول لامي قالتلي : الذريه هبه من الله عشان كده لازم يدعي باسم الله الوهاب ، وده اللي خدت بالي وانا بقرا القرآن ..
- سيدنا زكريا سال بالهبه فقال " فهب لي من لدنك وليا " وقال " رب هب لي من لدنك ذرية طيبه " .. وربنا لما استجاب قال " فاستجبنا له ووهبنا له يحيي " مش ولد وبس ، لا وكمان نبي ، وكمان زوجته انجبت وهي ٨٠ سنه ..
- وسيدنا ابراهيم قال " رب هب لي من الصالحين " ولما جاله الولد حمد لله بالهبه فقال " الحمد لله الذي وهب لي علي الكبر اسماعيل وإسحاق " .. ومكنش ولد بس دول اتنين ، وانبياء كمان وهو داخل ع التسعين ..
- وقال لسيدنا داوود " وهبنا له سليمان " .. وحتي سليمان لما دعا قال " هب لي ملكا لا ينبغي لأحد من بعدي ، انك انت الوهاب " .. ربنا استجاب وسخره الجن والطير والريح كمان ..
- سالتها يعني ايه وهاب ؟ قالت الذي يعطي الكثير بدون عوض وبدون سبب ، المتفضل بالنعم المنعم بها بدون استحقاق عليه ..
واسم الوهاب ف القرآن مرتبط بالحاجات المستحيله ، وبالخلفه والاهل والمال " ووهبنا له آهله ومثلهم معه " والرحمه " وهبنا من رحمتنا " .. الراجل قعد ٤٠ يوم يدعو باسم الله الوهاب
- الكلام ده من سنه ، دلوقت مراته حملت ف تؤام ولد وبنت ومن شده قلقه خاد مراته وسافر حتي تلد ومقالش لحد ، ورجع امبارح اول حد جاله امي عشان يبشرها سمي البنت مني ع اسمها والولد ع اسمي ، والله من شده الفرحه ع وشه خفت عليه يحصله حاجه ..
وانت كمان مهما كان طلبك كبير افتكر " وما ذلك على الله بعزيز " ودايما تدعي باسم الله ( الوهاب )
